BARKA

España hortan izan da segur asko bitxikeri:

                Horra nun zaikun etorri

                Euskadirat Galtxagorri

Jainkoaren amodioz jazartzerat apezeri.

Berriki apez suhar bat hil beharrez zeramaten;

Hil-harrietan tiroka odolez estali zuten.

Ifernuan zer irriak orduan egin dituzten.

Apez gaixoak begiak, suharrik, zerurat dauzka,

                Gizon bat doa lasterka

                Bularrak zilatzen diozka:

Jaunak bezala hiltzean dio: «Jainkoa, oi, barka!»

Apez haren kar sainduak lurrak ikusi balitu

Bai eta zer gizon gaitzaz mundua zuten gabetu,

Lurrak berak hiltzaileak, segur, zituzken suntsitu.

Nor zen? Zer egin ote du? maitatu herri zaharra

                Eta langilez leherra

                Itzularazi ongira.

Nor zen? Apez suharrena: Aitzol, Aitzol kartsu hura.

Garrak ezeztatu nahiz bihotza dute zilatu;

Bainan gure bihotzerat gar hek zaizkigu airatu.

Zure heriotzak, Aitzol, fruituak emanen ditu

...-3-37