www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Pindar eta lano
Xabier Iratzeder
1920-1941

      [liburua osorik RTF formatuan]
      [inprimitzeko bertsioa PDFn]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

ORRO IKARAGARRIA

 

                        1936

                        Euskal-bihotzak irakitan...

 

Zure bozaren azkartzera,

        Itsasoa, berma!

Amatto baten samurra

        Zait gaur orroama

Bihotza urratzen dautan

Harrabots bat egun hautan

Haizeak han harat baiterama.

 

Gaur tiroka ari dire

        Herrian elgarri,

Salbai gaixtoenen pare

        Odolez egarri.

Jaunak ez dezake onar,

Minez leherra baitakar,

Anai arteko gudu gaitz hori.

 

Anai odola herrari

        Eskainiz nasairik,

Euskadi gure amari

        Bularrak beterik,

Haurñoak hurrupatzean

Hilen dire gerruntzean.

Zer aterako da? zer? ... hortarik?

 

Han orai zenbat gorputz hil!

        Zenbat gauz lazgarri!

Nolaz ahantz, nolaz ohil

        Hainbertze tzarkeri?

Zerk batetara detzazke?

Jauna emozute bake...

Oi, kanoiaren burrunba hori!

 

...-8-36

 

aurrekoa hurrengoa