www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Uhaineri nausi
Xabier Iratzeder
1958 -1971

      [liburua osorik RTF formatuan]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

SAINDU BERRIAK

 

Euskal-Herriko supazterretan

        sugar beroen argiak

Lehen zituzten dirdir-arazten

        euskaldun gazten begiak.

Orai guziak histen zaizkigu,

        argiak eta egiak:

Saindu berriak behar ditu bai

        oraiko Euskal-Herriak.

 

Barnetik zaiku husten hasia

        Euskal-Herriko bihotza:

Erdal-laparrak, erdal-loreak

        gutan nausituz dabiltza.

Loaren loaz ez gaitezen hil

        nolaz ote ni ez mintza:

Saindu berriak behar ditu bai

        oraiko Euskal-Herriak.

 

Ostoak histen, adarrak hiltzen

        ari zaizkion haitzari

Bizi dadien, berpitz dadien,

        ez etor, otoi! dantzari.

Sineste-garrak behar zaizkio

        erro-barnetan ixuri:

Saindu berriak behar ditu bai

        oraiko Euskal-Herriak.

 

Berrikerian dute ainitzek

        euskaldungoa galdua,

Indarkerian bertze batzuek

        euskal-zainetan den sua.

Berrituz gaiten euskaldun egon,

        gure zai dago mundua:

Saindu berriak behar ditu bai

        oraiko Euskal-Herriak.

 

...-1-71

 

aurrekoa hurrengoa