Egun batez, ama hilen...

GAUA

Gaua da gaua, gau beltza

Sor-gelarat baiterama

Gau beltzak ene bihotza:

Entzun, ama; ni naiz, ama.

Bazaude ixil ixila

Ilunbetan pentsaketa:

Bizi hau joanen zaitzula

Azken hatsa eman-eta.

Gau da gaua, gau latza:

Hil-ikara, hil-marruma...

Zoin den bakarrik bihotza!

Izan bake; ni naiz, ama.

Hilez bezala naiz bizi

Jauna baitan bizitzean,

Nahiz bake pitz-arazi

Hil beharren bihotzean.

Fraidetuz dautzut min egin,

Nik min hori ezin asma;

Bainan gaur zure zurekin

Lagun bakar ni naiz, ama.

Ez begiez, bai bihotzez

Dezakegu Jauna suma;

Hor da, nerekin erranez:

Musu eman; ni naiz, ama.

26-10-67