www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Uhaineri nausi
Xabier Iratzeder
1958 -1971

      [liburua osorik RTF formatuan]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

                        Ph. Veyrin zenari

 

 

HAIZ-HEGOAN

 

                «Si Dieu m'a parfois parlé et si j'ai osé

                lui répondre, c'est à la vue de certaines

                aurores dans la campagne déserte

                où soufflait le vent du sud.»

                        Ph. V., 26-3-57.

 

        Haiz-hegoan, goiz-argian,

        Xoratu zaitzu begia.

        Haiz-hegoan, goiz-argian,

        Zoin eder Euskal-Herria...

 

              * * *

 

Munduko minen ume lañoa

Euskal-altzorat zinen erori:

Hor zaitzu piztu hor behakoa

Euskal-lurreko eder orori.

 

Bai hezurretan, bai bihotzean

Barna zinaukan munduko mina

(Euskal-goxoan zu goxatzean)

Lapurtar amak ezin du joana.

 

        Haiz-hegoan, goiz-argian,

        Xoratu zaitzu begia.

 

Hezurrak eri, bihotza zauri

Tragan duzu euskal bidea,

Itsasoari, mendi gaineri

Barne guziaz maiteki beha.

 

Gainen ederra, etxen goxoa

Bazinakizkan, xortaka biltzen:

Zuk Irisarri, Larrun, Ainhoa

Zoin zinituen maitez maitatzen!

 

        Haiz-hegoan, goiz-argian,

        Zoin eder Euskal-Herria.

 

              * * *

 

Ni ere minez joan nintzen behin

Euskal-bidetan, eder-bidetan,

Gure lurreko ederrenekin

Aldare baten egin nahian.

 

Euskal-bidetan, eder-bidetan

Ameska nintzen igan zurekin:

Zure laguntza eman zinautan

Eta geroztik bat ginen egin.

 

        Goiz-argian, haiz-hegoan,

        Zoin sarkor euskal-gogoa...

 

              * * *

 

Euskal-elizek duten argia

Nahiko nuen zutan ezarri.

Ai! bainan bihotz eriegia

Nork zabalaraz goi-argi horri?

 

Ezin osoki adiskidetuz

Elgarren minen minez ibilki,

Gure bihotzak joan dire pleinuz

Noiz elgar ote argian aurki...

 

        Haiz-hegoan, goiz argian,

        Xoratu zaitzu begia.

 

              * * *

 

Gu bien minak, bien lehiak

Ez ote ziren euskal-aldare?

Horko nere dei, nere graziak

Ez ote ziren piska bat zure?

 

Hargatik beraz kraskaratzean

Jaun Zerukoak bihotz axala,

Omen zinuen begitartean

Euskal-semeen argi zabala.

 

        Goiz-argian, haiz-hegoan

          Zoin sarkor euskal-gogoa!

        Haiz-hegoan, goiz-argian

          Xoratu zaitzu begia:

        Goiz-argian, haiz-hegoan

          Aditu duzu Jainkoa.

 

4-2-62

 

aurrekoa hurrengoa