www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Uhaineri nausi
Xabier Iratzeder
1958 -1971

      [liburua osorik RTF formatuan]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

ZENBAT

 

Zenbat euskal-adiskide

Guk hoin maite gauzen alde

Zabiltzanak dena fede,

 

Zenbat euskal-adiskide

Dena bihotz, dena fede

Hilak eta joanak daude...

 

Fedearen suak eman

Kar olderik gorenean

Lur huntarik zaizkigu joan.

 

Euskal-minez bazabiltzan

Eta —ezin dudan eman—

Kristo zuten bihotzean.

 

Kristok berak zerabilan

Hainbertze min, hainbertze lan

Ez daiteke alfer izan.

 

Hainbertze min, hainbertze lan

Kristorekin jasaitean

Hartan dire tanpez igan.

 

              * * *

 

Hedoi beltzek eguerditan

Iguzkia gordetzean

Hila dela ezin erran.

 

Lur ziloek bat batean

Ibai-urak irestean

Ez direla ezin erran.

 

Nigar hipek ezpainetan

Maitasuna mututzean

Joana dela ezin erran.

 

Gure soaz goragoan

Arrano bat airatzean

Galdu dela ezin erran.

 

Fededun bat itzaltzean

Nork ez ote bozik erran:

Sartu dela Jaun Goikoan;

 

Sartu dela harekilan

Guk hoin maite gauzak dauzkan

Den bizirik betenean.

 

31-1-71

 

aurrekoa hurrengoa