www.armiarma.eus
idazleak eta idazlanak Herri literatura TESTUAK Corpus arakatzailea Klasikoen Gordailuari buruz



Argiz argi
Xabier Iratzeder
1947 -1957

      [liburua osorik RTF formatuan]
      [Literaturaren Zubitegia]

 

Iturria: Biziaren olerkia, Iratzeder. Gero, 1983

 

 

aurrekoa hurrengoa

JO SOINUA JO!

 

Arantzazuko fraide gazteak

Xirola tanbolinekin

Etorri zaizkit soinu joiterat

Eta nik dantzan ez jakin...

Jo soinua jo, fraide gazteak,

Mundua dantzan has dadin.

 

Zer ilunbetan, zer galbidetan

Den orai Euskal-Herria...

Ai, zorionez baita oraino

Arantzazuko Argia!

Euskal-zainetan otoitzez, lanez

Ixur betiko Bizia.

 

Zoin egia den Arantzazuko

«Aitona zarrak» ziona:

«Euskalduneri eskasten zaiku

elgarren anaitasuna».

Arantzazutik ur-xirripaka

jauts bedi eskas zaikuna.

 

Arantzazuko fraide gazteak

Xirola tanbolinekin

Eguerri gauaz jo soinua jo

Mundua dantzan has dadin:

Guk ere dugun euskal-bihotzek

euskaltzaleek bat egin.

 

                * * *

 

Arantzazuko Eguerri gauan

Soinu, kantuan igeri...

Amets eta dei, lo kuluxketan,

Egin dut Euskal-Amari:

Hura dadien, ixil-ixila,

Euskal-bihotzen lokarri.

 

Eguerri gauan euskal-lurretan

Denak baitzauden kantari,

Agian Amak barnerat dauku

Bere goxoa ixuri;

Bai eta egin, ber-sorraraziz,

Bere Haurtxoa iduri.

 

Handi nahiak, guhau nahiak

Gaitu guziak nahasi.

Beha dezogun lastoratu den,

Ezeztatu den Jesusi:

Hari jarraikiz ]aster gintazke

Bai guhau eta bai nausi.

 

Arantzazuko Eguerri gauan

Soinu, kantuan igeri...

Ikusi ditut fraide gazteak

Herriz herri soinuz ari

«Gaiten Denak bat, Huna Eguerri:

Jos gaiten denak elgarri.»

 

                * * *

 

Arantzazuko fraide gazteak

Xirola eta tanbolin...

Har zuen Ama, guzien Ama:

Gu ganat etor harekin,

Gure zain eta gure lokarri

Ainhoan berritz jar dadin.

 

Bere kapera han du gainean

Bainan bera nun ote da?

Arantzazuko zuen Amaren

Arrunt iduri bat molda

Eta harekin, igan kantatuz

Hain maitatua den malda.

 

Arantzazuko Ama dagola

Oñaten eta Ainhoan

Bi aldetako euskal-jendea

Gauden Amaren altzoan,

Mendez-mendeko gora-beherak

Gaindituz bake osoan.

 

Arantzazuko fraide gazteak

Xirola eta tanbolin...

Entzun kantuak, har zuen Ama

Etor Ainhorat harekin

Bi aldetako fraidek diogun

Ama berari dei egin.

 

Arantzazun, 25-12-56

 

                        AIREA: Amodioa zoin den zoroa.

 

aurrekoa hurrengoa