Sukreriatik... Euskal-Herria maitez
Arrossagaray, J.C.
1
Ilabete bat badu etxetik urrun naizela joana
Egun guziez hatxemaiten dut betarrabak daukan lana
Osagarrian izanez geroz gorputza eta arima
Nun nahi berdin aise bizi da jende suhar eskualduna.
2
Ehun ta zonbait eskualdun gira sukrerian elgarrekin
Egun guziak abian dira beren on eta gaitzekin
Bainan bihotzak atxikiz beti atsegin hoberenekin
Eskual kantuak ez dira nehoiz setiatuko gurekin.
3
Batean gauaz bertzean berriz lanean ari egunaz
Pleņitzekorik ez daukat segur egina dautaten planaz
Gogotik ari bada jendea lanean ta omor onaz
Ez du sekulan urrikirikan izanen egin duenaz.
4
Sukrea frango egiten da ta saltzen dituzte bakarrak
Geroan ere izan ditezen oraino bezain azkarrak
Huntaz haziak izan ditela Eskual-Herritako haurrak
Eskualdunek in lanak baititu bere gisako indarrak.
5
Egia beti gogoan daukat ta ertea ez herabe
Sukrea ainitz jatea uste dut denek duketen hobe
Kafe ta esne egun guziez jendeak edanik ere
Gosturik bate ez da kausitzen sukrerikan eman gabe.
6
Eskual-Herriko gazte guzier aipatu behar dutana
Mutil sartzea laboraritan ez da joko abilena
Nai baduzue pasatu une trangil eta urosena
Aitor dautzuet sukrerietan egin-azue sasoina.
7
Gaztea frango bagira hemen Eskual-Herriko xokotik
Guziek elgar aditzen dugu mintzatuz mintzair'beretik
Bainan gauza bat dugu gaixtoa, erten dautzuet oraitik,
Gure sort-herri maite goxoa ezin kendua gogotik.
8
Bainan hargatik badugu beti zerbait denen ahanzteko
Maņetofona gure kantuen behar bezala biltzeko
Hori daukagu plazer osoan denen atxik-arazteko
Ainixko pertsu entzuten dute gero nitaz orroitzeko.
9
Azken pertsua oraino hemen finitu behar dut hola
Eskualdun garbi atxikiz beti bihotz barneko odola
Lagun onekin izana-gatik errege banitz bezala
Aintzila herri ta Aintzildarrak ez tut ahanzten sekula.