Euskera-ri mintzo Kalifornia-tik

Arrosagaray, J.C.

 1/

 Ez dakit noiz danik ziren Euskera maitagarria

 Arbasoen mende-tarik gure gana etorria;

 Nehork-ere ez daki zu noiz, eta non ziren sortia,

 Iduri duzu mirakuluz zeru gainetik jautsia.

 2/

 Jakintsunak erabili bilatzen zure erroa

 Duda gabe barna duzu ezin atzemanezkoa;

 Horgatikan zabaltzen duzu munduan zure fruitua,

 Udan ala neguan dago beti berdin loretua

 3/

 Euskaldunek ezagutzen zaitugu zu haurretikan

 Burasoen belaunetan ginelarik larririkan;

 Zu entzunez atsegin dugu beti denik geroztikan,

 Zu gabe guk ez dezakegu egun baten bizirikan.

 4/

 Aita-Amen ahotikan ikasi karesa beroz,

 Hain eztiki aditzean borondate amodioz;

 Zuk bakarrik konsolatzen gu, han eleka hasiz geroz,

 Ordutikan gurea zire, eta izanen betikotz.

 5/

 Badakigu atakatzen zaituztela aspaldian

 Zu desegin nahiz ari dira jelosi handian;

 Bainan ezin zaituzte egin sekulan Euskal herrian,

 Iratzartu bai gire oino, beherrezko tenorian.

 6/

 Laidotua izan zire ezin sinets heineraino,

 Bai erdaldun eta frantses jukutrek ahal dutena;

 Bainan orai xerto berriez muntatua kaskoraino.

 Horren beste laguntzale zuk ez duzu izan oraino.

 7/

 Biltzarretan, kasetetan, baita ere bertsolari

 Zure alde errepikan aste guziz dire ari;

 Jarraikitzen badute hola, hasia duten lan hori,

 Euskera zu izanen zire, Euskal herrian lokarri.

 8/

 Berritze bat aspaldian ginautzun guk egin behar,

 Desbardinki mintzo gire, ezin konprenituz elkar;

 Orai giro Iratzartu-ta, Ez gaitezrn berriz lokar,

 Altxa zaite zuzenki gora, eta egon beti azkar.

 9/

 Zonbat urus ezagutuz konbeni den Euskalduntza,

 ikastolak zabaltzia, pare gabe baliosa;

 Aspaldi nik hortaz nuen ba egina lehen amentsa,

 Orai obrak hor ikusirik, pozez bete zait bihotza.

 10/

 Euskera zu, mintzairetan, maite zaitudan bakarra.

 Sort-herritik urrun daukat beti berdin zure karra;

 Altxagarri zire neretzat, nola zeruan izarra,

 Zurekilan nahi bai nuke igan bizitza ondarra.

 11/

 Euskaldunen mintzaira zu egon garbi ta lorios,

 Zurekilan bai gire gu beti danikan kuralos;

 Maite zaitut bihotzetikan, eta maite amodioz,

 Gelditzen naiz erran gabe ni, sekulan zuri adios.