Eskual-Herrira pidaia 1970-ean
Arrossagaray, J.C.
1
Mila bederatzi ehun iru-ogoi ta amarra
Pidaia luze batian aurten naiz joan beharra
Jinko jaunak emaiten badu neri behar den indarra
Duda gabe ikusiren dut ene sort-leku xaharra.
2
Luzaiden sortua eta gazte denboran han azi
Ogoi urte betetzian sort-herri maitea utzi
Geroztikan Kalifornian nabil harat hunat beti
Nekaturik ardurenian, eta plazer arras guti.
3
Nahi-gabe anitzetan iragan bizi modua
Halarik ere oraino badut kontsolamendua
Gaizkiago zonbait ikusiz; naiago neure gradua
Gainera zeruan sartzeko dut esperantza osua.
4
Esperantza atxik dezagun bizi gireno mundian
Harek gaitu kontsolatzen pena guzien erdian
Baita ere oro argitzen nun-nahi behar ordian
Aingeru bat badago beti, zerutik gure guardian.
5
Otoitz egin dezakogun aingeruņo fidel horri
Laguntza hark eman dezala gure behar ordueri
Xantza onez gida gaitzala, orai goatzin pidaiari
Biziko guk oroitzapena izanen baitugu hori.
6
Ekaina-in ogoi-ta-bortza, partitzeko tenoria
Los Angeles-en hartuko du frantses airezko xoria
Hau izanen da enetako esperientzia berria
Airekotan sartzen naizela orantxe lehen aldia.
7
Orai arte dakiguna gure pidaian segida
Amabi ordu ta erdiz arribatzen Paris-era
Handik gero Baiona alde berriz airatuko gira
Uztaila-ren lehen aireko uste dugu Luzaide-ra.
8
Arnegi-tik jakina dut uste ez nuen berria
Automobilez estaltzen dela karrika guzia
Arras nekez dela handik Luzaide-rat pasatzia
Mendi gainez hartu beharko haurrian kasi bidia.
9
Jendakia, adixkide, baita Luzaidar guziak
Urrun danik bihatzen tut oraiko konplimendiak
Ez ahantzi egiteko guretzat otoitz nobliak
Zuen ikusteko ditugu, hartzen irrisku aundiak.
10
Aitzinago joan gabe orai emen gelditzen niz
Nahiz oraino badauket zueri erraiteko anitz
Kalifornian egiazki mintzatzera libro bainiz
Eskualdun sortu, eta hazi, eta Eskualdun hilen niz.
