Eliza eta gizona
Arrossagaray, J.C.
1
Jainko emaitea, gaurko munduak nolakoa du dirdira
Urrats guziak ikusi eta bihotza jin zaut erdira
Eliz gizonak ta ezkonduak ikusiz nago begira
Gure fedea ez ote doan orai lurraren azpira.
2
Lehengo arak gaur diotenaz zabiltzan bortitzegiak
Bainan zuzena nundik heldu den zabal dauzkagu begiak
Lehen gizonen artzain zaudenek mendian zaintzen ardiak
Indar geiago ez ote dauka egun zeruko argiak.
3
Zuzena denak ikusiko du gure barneko zikina
Behin beltzatuz geroz sekula santan argitu ezina
Ifernuan den Satan aingeru Jaunak haizatu higuina
Horri burua leher akozu zeruko Ama birjina.
4
Gure manera ikusi eta ez deraukazu atsegin
Bide txarretan gabiltza eta nekez daiteke aldegin
Krixtoren ama, nahi naukezu errespetuaz galdegin
Zaindu gaitzazun Satanen mutil nehoiz ez gaitezen egin.
5
Bekatoreak egiten dauku borta guzietan hela
Hirriskuaren gakoa bere dauka, ezin da bertzela
Iduritzen zaut otoitz kartsuez hori itzal ditaikela
Gaizki eginen saritzat dago betiereko kartzela.
6
Bai ordenatu eta ezkondu, denentzat tentamendua
Bekatuak du emeki egin nahi here zimendua
Gaizki erori balinbagira, otoi urrikalmendua
Zeruko Aita ukan zazu ta emazu barkamendua.
7
Munduko ainitz gorabehera egun ikusten ditut nik
Ez dut erraiten ni nihaur ere arrunt sanoa naizenik
Ene hitzetan ez dut emaiten protximoari hobenik
Bainan goberna gaiten guziak ahalaz hobekienik.
8
Gaurko pertsutan gogoan naukan hau erran behar nuena
Ezin jasana daukat oraiko fedezko beherapena
Zeruko Jaunak ez gaitzan otoi bortitzenetik kondena
Errespetatu behar ginuzke ezkontza eta ordena.
9
Ama birjina, zeru gainetik guri begira dagona
Heda zaguzu gauden haurreri zure borondate ona
Mundu zabalak sendi baleza laike gure zoriona
Behin betikotz batera gaiten eliza eta gizona.
10
Mila bedatzi ehun lau hogoi eta hamargarrenean
Pertsu berriak idatzi ditut orai Bazko egunean
Nahi badugu goxoki bizi bai eta zorionean
Errespetuki goberna eta beti bide zuzenean.