Apendizitari adio
Arrossagaray, J.C./EGILEA>
1
Mila bedatzi ehun ta hiru hogoi ta hemezortzia
Ene gorputzak hartu izan du orduan diferentzia
Urte bat aintzin ainitz sofritzen barnetik nintzan hasia
Nehori ez dut, nik desiratzen holako penitentzia.
2
Maiatzak daukan hamahiruan operatu nindutena
Behin betikotz kendu dautate ene etsai handiena
Apendizita baita erdaraz hau izendatzen dutena
Agertu aintzin zonbait lazdura eman arazten duena.
3
Koxe-Mari Larr' izan da ene kuraiaren emailea
Bere eriez arta duena hau zinezko langilea
Bihotz guziaz estima daike dagon ongi egilea
Jainkoak luzaz bizi dezala holako sendagilea.
4
Alain Anderson adixkideak ere egin guardiak
Ezin ahantziz gelditzen zaizkit hamarretarik erdiak
Noie artzainak segitzen ditu bere meneko ardiak
Zuek enetzat berdin eginik ainitz malte zauztet biak.
5
Maiatz hamabi aldean sartu nintzan Ispuran klinikan.
Nahi ala ez partitu behar ezin egin bertzerikan
Gauza ttipia zela pasaia lehenago jakinikan
Esperantza hau gogoan naukan jitea sendaturikan.
6
Biharamuna hamahirua abisatua ninduten
Ene bihotzak bai eta zainek beldur aire bat bazuten
Orratz xixta bat eman orduko oz nuen deusik entzuten
Ene gorputza hilik bezala laster ezarri baitzuten.
7
Lokartu eta fitesko baitzen orentto baten buruko
Ohartu nintzan berriz gostua baneraukala munduko
Ustez ez naukan solas ahulik ene ahotik galduko
Nahi guziak erran arazi dauzte botza jin orduko.
8
Erran dautate pertsu bat ere kantatu dutala merke
Ospitaletan ere dabiltza naski irriaren eske
Erdi lotarik eman pertsua zer den kurios nintake
Norbaitek kanta balezaut hure gogotik paga nezake.
9
Zortzi egunez artatzaileak onak zaituztet jujatu
Merezi baino hobeak ainitz zareztelakotz gertatu
Ta ni zuentzat zer ote nintzan hori ezin dut asmatu
Ontsa erranak gogoan hartuz otoi gaizkiak barkatu.
10
Ospitalea, zure parerik nihun ez dago ederrez
Senda lekua zirelakoan eta azkarra indarrez
Bainan bizian orroituko naiz zure barneko nigarrez
Jaunak begira nezala berriz jitetik zure beharrez.
