Amodioaren ederra
Arrossagaray, J.C.
Pertsu berriak kantatzen ditut maitasunaren gainean
Hori nolatsu hartu behar den eta nolako heinean
Bi gaztek elgar maite badute amodio berdinean
Nola solasta ditazken entzun gaztetako adinean.
MUTiKOA
Neskatxa gazte xarmagarria ene begiko lorea
Eskual-Herrian bizi zarena nihun parerik gabea
Galdatzen zaitut maitasun handiz utzirikan herabea
Nahi duzunetz izan betikotz ene lagun ta jabea.
NEXKA
Mutil galanta ene ondotik aspaldian zabilzana
Iduri duzu bihotz guziaz oraitik eni emana
Bainan hargatik fidela balitz oraiko zure errana
Gogotik zuri eskaint nindaike izena eta izana.
MUTIKOA
Ez ahal duzu nehoiz frogatu nik erranetaz gezurrik
Ez baitut egin nexka gazteri sekula santan malurrik
Ibili banintz bide faltsuez anitzetan tronpaturik
Egun ez nintzan zure ganako maitasunak pusaturik.
NEXKA
Hitzetarikan jujatzen zaitut zintzoa eta leiala
Zure bihotza mamitsua da ez da bakarrik axala
Bizi guzian egon bazinte goxoa orai bezala
Onhartzen zaitut ene senartzat nai baduzu bereala.
MUTIKOA
Atseginekin ikusten baitut zuk duzun borondatea
Nik ere zerbait badaukat eta zuretzat ez da kaltea
Zure ganikan jakin dirota, ai ene izar maitea,
Gu elgarrekin esposatzekotz zonbat daukazun dotea.
NEXKA
Zuhaur gaztea eta sistima lenagoko xaharrena
Ez du diruak egiten gero etxen bakerik onena
Nahi baduzu nitarik entzun egiazki hala dena
Etxe batean maitasuna da doterikan ederrena.
Pertsu berritan irria ere ez da gostatzen kario
Ainitz ezkontza egin izan da lehen dirua medio
Bainan oraiko gaztek badugu horrentzat erremedio
Maitasunikan ez balinbada diruak ez du balio.