Aintzileko Ama Birjinari ohore
Arrossagaray, J.C.
1
Zeruko amaz hartzen dut egun pertsu hauetan sujeta,
Haren seme bat koplari orai izaitea zerbait baita.
Goretsi nahi zaitut aspaldi, hori merezi duzu-ta
Zure itxura xaharra gogoz dezaket egun espanta.
2
Sei mende hurbil badu nunbait-han zure itxura dugula,
Ez da dudarik potret guzitan xahartuena dagola.
Lurdatik landa ohartu nintzan estimatuz zaukatela
Eskual-kasetan ez baitzitaken agertuko ez bestela.
3
Arteguiet jaun erretor ohi haren denboretan naski
Ganer batean potret xahar hau, omen zagoena gaizki
Jaun erretorak ta Anna Laudy-k apaindurik hain garbiki
Gure elizan ezarri zuten tronuan hanbat polliki.
4
Geroztik hunat izana duzu gure elizan estimu,
Ordainez otoi zeru-gainetik begira gaitzazu fermu
Adi-zkitzu zuk bake eskasez diraden ainisko pleinu
Gaixtakeriak suntsi litazke fede geiago baginu.
5
Ama birjina dugu Aintzildar jende guzien patroina
Herri ttipia izana-gatik zuhauk onesten duzuna
Guzien partez huna erteko neri gelditzen zautana
Azken orena jiten denean onhar gaitzazu zu gana.
6
Igande oroz zuri begira bihotza zauku xoratzen
Zu erregina ikusiz guri nola daukuzun behatzen
Gure otoitzak agian ongi ahal duzketzu aditzen
Itxura hor da, ta zuhaur ere etzira urrun ibiltzen.
7
Eskuin eskuan emana duzu galdu gaituen fruitua,
Salatzen dauku nola mazteak galdu zeraukun mundua
Segitu balitz tentazionez hasia zuen gudua
Jende guzia ordu beretik izanen zaiken galdua.
8
Beste eskuan duzu beharrik zure seme dibinoa
Horren medioz itzali baitzen etsai tzarraren lanoa
Ixuri duen odolarekin garbitu zaukun gogoa
Akabo baitzen bestela gure atseginezko geroa.
9
Ama birjinak salbatu gaitu bere semain bitartez
Gure odolaz zinen andre bat, baitzinen zuhauren jitez
Krixtoren Ama agertu zinen Jainko Aitaren bitartez
Nahi baitzuen Ebaren falta estali birjina batez.
10
Herri guziain izenean gaur egiten dautzut oihua
Bakarra zira daukazula zuk «Birjina Saindu» gradua.
Egizu otoi zure besotan izan dezagun goxua
Eternitate guzian denek gozatuz parabisua.
