San Ignacio-ren zeruratzeari
Arana, Jose Ignacio
Izarrez-izar, euzkiz-eguzki,
Milla munduren artean
Aingeru-talde soñulariyak
Zabaltzen dira batean.
Zillar zurizko ta urre gorrizko
Distiadura isuririk,
Soñeko ederrak daramazkite
Aizeak apaiñ jarririk.
Dijoaz egan pozez gañezka
Astiñdurikan egalak,
Murgildurikan beren biyotzak
Betiko atsegiñ-ujolak.
Oyen erditik gure Ignacio
Bere jargoira zanean
Bazter danetan pesta geitu zan
Zerutar galai artean.
Bere garaipen paregabea
Kantatzeari benetan
Ekin zioten, danak urturik
Jainkozko amore garretan.
¿Nun dira lurrak? ¿Nun dago Erroma?
¿Nun andizki goi erpiñak?
Uts-ezerezak dira Zeruan
Mundu guziko atsegiñak.