inprimatu
Otoitza
Izenburua:
Otoitza
Sinadura:
Joxe. Azurmendi
Urkizaren iruzkina:
Egilea(k):
Azurmendi, Joxe

Argitalpena:
Olerti.
Urtea:
1968
Argitalpenaren urtea:
Alea:
1968 I-II Bakardade
Orrialdea:
16-17

Otoitza

 

J. Azurmendi

 

 Zu bezain altsu banintza ni,

 Jauna, ez litzake munduan

 tristurarik izango, ez litzake

 ume itsurik jaioko,

 ez litzake maitasuna nekatuko,

 ez litzake ilunbea triste izango

 eta tristeago argia,

 eta ni Zu bezain ona banintza

 onago izango nintzake Zu baino;

 Jauna, ez nuen andre konkordunik egingo,

 ta ez umerik hiltzen utziko

 ta ez erririk agonian

 ta ez begien argirik zahartzen

 ta ez amarik aur hila bihotzaren gainean

 duela bakarrik abandonatuko.

 

 Eta etzuen bere buruaren gainean neska batek

 nire anaiagati alferrik negar egingo.

 

 Etzan mundu au olakoa izango, ez,

 eta guk dakigu hitz onek esaten ez duen

 zer esango lukean gure hitza zure justizia balitz.

 

 Izango baitzan nire hitza zurea ez bezalakoa,

 eta etzuen kreatura galdu baten oihartzun banala

 urik ez daukan desertuan sortuko,

 ta ez nuen olakoa egingo hitza

 gizonok gurutzera eramanaren kulpa izatekoa.

 

 Zure begiak balira nireok, Jauna,

 harri batekin, aizto batekin, lotsa batekin

 itsutu nahiko nuke bearko nire begiratu zurea.

 Bainan ezin, bainan inola ezin.

 

 Aingeru bat egin baninduzu beintzat

 nire egoak norbaiti emanda hiltzeko...

 Bainan gizon. Eta nork nahi du gaur

 nire maitasuna ezertarako!

 

 


inprimatu