Uzpasitxa, neure jayotza lekua

Enbeita, B.

 Uzpasitxako auzunetxua

 Neure jayotza lekua!

 Amaika aldiz zure altzuan

 Egin dot ames gozua...

 Geruago ta geyo maite dot

 Neu jayo nintzan txokua;

 Maite ezbaneu izango nintza

 Sentzunik bako zorua.

 Aingerutxua jayo nintzan da

 Seaskatxuan lo goxo...

 Ugatz-edaten neure amatxok

 Altzora egin arte jaso.

 Neure gilborra asetu arte

 Ugatza emon ta gero

 Barriro bere seaskatxora

 Egin dagidan lo ta lo.

 Aman ezpanak esan leikezan

 Itz goxoenak, neuretzat...

 Jateko bigun gozo eztia

 Geienak aurtxoarentzat;

 Beso artian mosu ta txera

 Maitasun ezaugarritzat,

 Eta aurtxoaren irri-barria

 Bai pozgarri amarentzat!...

 Landaratxua eldu oi dan lez

 Apurka, aundia izaten

 Ni be olantxe ogei urtera

 Igarri gabe eldu nintzan

 Gaztetasunak bultz-eraginda.

 Etxetik nintzan urruntzen.

 Au ta guzti be, aitak eta amak

 Bardin ninduben maitatzen...

 Urtiak juan urtiak etorri

 Nire sentzuna betiaz

 Gero ta geyo gogoratzen naz

 Neure baserri politaz.

 Gaztearoko zoro bizitza

 Eta jolasak an doaz!...

 Nai izanda be, ezin ni aiztu

 Neure jayotza lekuaz.

 Ainbesteraño maite ninduben

 Neure aita eta ama,

 Ainbeste jolas gozo ein neban

 Neure baserri polita,

 Nire biotzak itxiko ete dauz

 Baztertu edo aztuta?..

 Ez, lurbira ontan jartzen ezpayat

 Neure sentzuna galduta!