Urte zaharretik barrira, zer?

Enbeita, Balendin

 Urte zaharra izan da

 Askoren mingarri

 Sendi askorentzako

 Malkozko iturri,

 Urte zaharra joan da

 Heldu da Urteberri

 Baina eskuak hutsik

 Ez bedi etorri

 Gorrotoak kendu, ta

 Bakea ekarri.

 Berriz be txiroentzat

 Kontua ugari,

 Eta beti bezela

 Indarra agintari,

 Bitarteko maltzurrak

 Hoien zerbitzari,

 Txikiak atzipetu

 Lagun goikoari,

 Niretzat biak dira

 Berdin pekatari.

 Errudunak hor dabiltz

 Maltzur ta ixilak

 Gudarako zabaltzen

 Kainoi ta fusilak,

 Hoiek gutxi direla

 Bonba ta misilak,

 Milakaz erru bako

 Zauritu ta hilak,

 Eta lutuz dantzari

 Herriko ezkilak.

 Izatez txiki baina

 Haundi guran amez,

 Goian hegatu gura

 «Arranoen» lumez,

 Herriak gerran jarri

 Bakearen ordez,

 Naiz ta oker jokatu

 Kontzentzirikani ez,

 Eskuak beti garbi

 Agertuten dabez.

 Jauntxoak ez badira

 Kontzentzian jarten

 Eta gerrako tresnak

 Ogi biurtuten,

 Herri menperatuen

 Kateak kenduten,

 Bakoitzari berea

 On bidez emoten

 Zaila da be indarrez

 Bakea egiten.

 Indarragaz bakea

 Egin nahi badabe

 Beste bide berri bat

 Hartzea da hobe,

 Maitasunez jokatu.

 Kainoiaren orde,

 Txiroari lagundu

 Zalantzarik gabe,

 Gura badugu izan

 Bakearen jabe.