Muxika Ariatzako Mixiñoiak

Enbeita, Balentin

 Goizeko seirak jo dabe ta

 Ariatzarrak itxartu;

 Mantak kentu ta jagi zaiteze,

 Jantzi ta eleizaratu.

 Aita Kurtzeko gure zaindari

 Biotzez maite badogu,

 Mixiñoi santu onetan iñor

 Etxian ez bei geratu.

 Ariatzarrak, jaiki ta bizkor

 Etorri eleizarantza,

 Eta bakotxak Aita Kurtzekoai

 Eskeiñi bere biotza.

 Zer balio dau nai dogun eran

 Erabiltia gorputza,

 Azken orduan galtzen badogu

 Galtzen badogu Zeruko bizitza?

 ***

 Mixioñetan gure Ariatza

 Dabil pozez ta kantari,

 Goizean kantuz goi aingeruak

 Dabizela esan legi.

 Aita Kurtzekon eleiza onek

 Zeru txiki bat dirudi.

 Bake ta poza lortu nai daunak

 Ariatzara etorri.

 ***

 Zubieta anaiak etorri yakuz,

 Arantza miñak kentzeko,

 Gorroto danak oinperatu-ta

 Biotzak askatuteko,

 Gure arimak garbitu eta

 Zeru bidean jarteko.

 Egin dazuen lan eder ori

 Izango al dogu betiko!

 Jaso daiguzan geure biotzak

 Jaun oneek goratuko.

 Era ontako Artzaiñak ditun

 Erria ez da galduko.