Aga zaharrean eskegita dagoen kurtzulu argiari
Enbeita, Balendin
Ezkaratzeko aga luzean
Untze zaharretik zintzilik
Eukan guztia eskeini eta
Bakardadean ixilik
Argi iturri argia zena
Iluna datza itzalik
Aga zaharrean kurutzetua
Argiaren truke hilik.
Ezkaratzeko aga luzean
Daukagu azken zotinka
Epetargia balitz bezala
Zokondo danai agurka
Azken arrasan daukan apurra
Aga zaharrarentzat dauka,
Itzali da ta geratzen dira
Biak elkarri besarka.
Aga zaharretik zinzilik zinen
Laguntzaile ta umila,
Beharr izana daukanen lagun
Aitzaki bako abila,
Neurri berdinaz argia eman
Neurri berean ongila
Ondorenguak egin duzuna
Gogoan izan dadila.
Bizitza labur arantzatzua
Ilunpekuak argitzen
Zeure lanaren ordainik ere
Ez zenuela eskatzen,
Orain betiko itzali zara
Ez da erreza piztutzen
Argiak ihes egin ondoren
Zurekin gara oroitzen.