"Orduan ere banekien ni ez nintzela zoriontsu
izateko jaio...
Horregatik dira hain inportanteak zorion apur
bat
ekartzen didaten pertsonak. Garrantzitsuak
bezain eskasak."
Pasarte iduriz anonimoa (a.u)
I
tutuguriren gau luzean
doluzko oihal zabala daramat
bizkarrean:
norbaitekin hitzegin behar dut.
neoromantiko garaian eraiki
marmolezko arkupeetan
goxokiz estali margo klasikoak
merke saltzen zituzten.
Asiatik etorri emagalduen
konpainian
bizpahiru egunez
munduaren barbaritatea
jasan nezakeen.
tutuguriren gau pasa zurekin.
alanbrez hertsi burdin beltzezko
portaleak
ez zitzaizkidan ireki:
esku larrutuetarik odola!
tutuguriren gau pasa luzea zurekin,
amodio eskasak utzi ur hatsak
hurrupatu genituen.
beldurraren horma itsuan
burua hautsi zait, klask!!!
non hago corto maltese?
II
Mariblankeko kaperan.
gaixtagile elkarte batean parte hartzez
akusatua.
zuzenkontra.
haizearen labanek azalak zilatzen.
uholde nagusiaren ondorioak
soy un pájaro que canta.
III
garai hartan
orlegiegiak ziren oihanak.
harrien
bustitasuna
bizkar hezurrean
sartzen zitzaidan.
erle belarrez gose nintzen.
esku ahurrean
purruskatu
lur mokorrez ase nahi nuen.
harrobian
beleek ahanztearen eresiak deiadarkatzen
zituzten garai hartan.
IV
atomo hatsa naiz
besterik ez
hautsetik hauts
quark errauts
besterik ez
ainara bihurtu nahi nuke.
V
gauaren hari ahulak
hiriko argi zurpailak
eurian itoko ditu...
ostaturik ez dago
kafe baten edateko,
haserre
nabil
bakarrik
gauaren hari ahulek
maitearen arpegia
neonez josiko dute...
oroimena galtzen ari naiz
karriken hats erreetan,
sagaio
arin
batekin.
VI
kahaken zorion eresiak gauean
zorion eresiak gauean kahaken
gauean kahaken zorion eresiak
eresiak gauean kahaken zorion
kahaka bakartien zorion kantak
entzuten ote nituen bazterrean
eresiak gauean kahaken zorion
gauean kahaken zorion eresiak
zorion eresiak gauean kahaken
kahaken zorion eresiak gauean.
