Isiltasunaren alde
Itxaro Borda
Ortzaiz unatuaren damutu hats errez
Noizbait etorriko da hitzaren ekaitza,
Urratsez senda dadin bai eta lasterrez
Jadanik herri gabe dabilan min gaitza.
Igande goiz hartako zeru ihitzetan
Izerditan isurtzen zitzaidan aditza:
Trufa lauen erdian, desertu hitsetan,
Noraino hustu behar ote da kalitza?
Miruak dantzan eta ardiak marrakaz,
Bideak galdu dira, errautsi mendeak
Soak betiko sartu herdoilen karrakaz;
Barreiatu zituzten, suntsitu kenteak,
Miruak dantzan eta ardiak marrakaz:
Isiltasun dorpean non dira jendeak?