Suarekin tematzen
Itxaro Borda
I.
Jasaten dugun negu hotzean
Noizbait berotzeko gisan,
Norbaitek suarekin tematzen
ausartu behar du:
guztiek dakite nola,
aholku emaile eder,
larderiatsu ardura...
Baina guztiak ez dira
ohoreagatik edo
soilik erretzearen beldurrez
sutik gehiegi hurbiltzen
- badakizu erre orbainak
itsusiak direla
aurpegiaren erdian!
II.
Gerla betean gaude. Badakizu. Baina gerla honetan armak
ez dira entzuten diren bakarrak: hitzek ere iraungitzen
gaituzte, eta suaren lehen lerroan izuak ez dauka tokirik
noski. Gure ele eskasekin gerizarik gabe aitzina goaz,
psikotropoz hanturik orden emaileen seguritatea segur-
tatzearren. Negarra begian. Errabia bihotzean. Kontuen
egiteko ordua etortzen denean, hautsirik zauriturik eta
gohaindurik ondorioen ateratzeko biltzarretan parte
hartzean, maniobrak gordean kudeatzen dituzten
stratogos axolatiek aldiz, bazter gauzkate: bere izena
erran nahi ez duen gerla batean sakrifikatuak garenak
gara. Argi dago.
III.
Barneko bake sainduaren zaintzeko
Gure artean kalapita eta ahanaz
Ikusiko gaituelarik
Etsaiak gutaz zer pentsatuko duen
Eskatzen dute mehatxuz
Eta suaren beldurra,
Indar bortitz eta mutu bilakatzen da
Ekin bideen geldotasunaren
Justifikatzeko.
Iragana bera suaren gaurko lotsari
Plegatzen zaio eta Hizkuntzaz
zer erranik ez?
Izuaren gezi gaziak oro
Zafia-zafia biltzen dituen
Erdi-mina da.
Aditza,
Auzo aditzekiko harreman
saminaren zigilua,
Beldurraren salatzeko
Maitasun ildo doloretsua,
Hersten eta mugatzen dute
Ekin bideen geldotasunaren
Justifikatzeko.
Iraupena irekitasunean
Bermatzen dela sinesten dutenak
Ahulak eta debalde
Direla iritziz
Su mihien dastatzera
Igortzen dira:
Ikas bezate azkenean,
Askatasuna eskatzen duguna
Baizik ez dela, eta ez eguneroko
Duda eta zalantzen harkaitzetan
Zitzikatua izateko arriskuan
Norberak eraiki dezakeena.
Ikas dezagula ondikotz
Egia.
IV.
Gerotik gerora ibil gaitezen beraz
Orainaren ukamenak bulkaturik,
Iragan ohoratuaren xendetan
Harro, eder, errespetatuak
Hondarrean,
Arrazoi dugula naski,
Besteak baino azkarragoak
Garelako.
Betiereko bakea lehian,
Heroien Josafateko soro saritzat,
Ifernua maite dugu.
Jainkoa gure alde
Pagano erreak izan arren!
V.
Beti hitza hitz
Erraten dute
Urrezko balitz
Luza digute.
Beren begira
Su errausteko,
Lehenak dira
Hitza hausteko.
Ezez naiz mintzo
Etsai ustelaz,
Baina bai zintzo
Gure batelaz!