Gauak baizik ez nau sostengatzen eta apirileko euri egunak
Itxaro Borda
I
eskubiderik, are gutiago biderik ez duen
lurralde kolpatu hau neurea ere dela
sinetsi nahiko nuke,
ustea ezuste harrigarri bailitzan
hazi eta gozatu;
baina etxerik ez dut, hitza odolustu didate,
mahain gurintsuetan, jakitate finko,
metatu arren
gramatiken, joskera eta estilo liburuen,
halaber entziklopedia tematikoen orrialdeak
debekatuak zaizkit
arrotz eta erdarakadetan natxikate jadanik.
eta ez dut nigarrik ixurtzen
aspaldi honetan begiak idor ditudalako
KAOSaren mineko
bakardadeak larrutu herriak zeharkatzean
gauak baizik ez nau sosegatzen,
eta hor dut zinez gogoetatzen
anitzez gehiago maitatu beharko zintudan.
zergatik da berantegi?
II
ez dut nigarrik ixurtzen, aspaldi hontan
begiak idor ditudalako, are gutiago
irri gutiziarik egia erran
karrrikan agurtzen ditudan borondatezko
hizkuntzalariak ari dira mundu-ez zaurituko
zaharren ezpainetarik aditz bilakaera ezberdinen
biltzen, aurrizkien mugak finkatzen
eta atzizkien heda-eremuak bereizten,
mututasun berriaren lekugiak kolorez apaintzen,
bapateko ixiltasun guneak marrazten!
bizkitartean, gure eresien aurkako gerla daramaten
handikiek hautatu eta ordaindu etnologoak
berriro ere hasiko dira hilerri aztertzen
lauburuak, esku-irekiak, ilargiak
eta eguzki ikurak zenbatzen;
bakardadeak larrutu bideak zeharkatzean
gure mintzairaren autentizitatea bilatzen
dutenean gohaina sartzen zait
eta gauak baizik ez nauela sosegatzen
harri hauts minerala bihurtzen naiz
eta badakit exiliotik edo heriotik
inor ez dela itzultzen.
III
herio latzetik, are gutiago exiliotik inor
ez dela itzultzen badakit,
bihotza deitzen den haragi puska elkorraren
oinazeetan anitzetan pairaturik
burua ordu eta lekutegi bilakatzen da,
zainak aldiz burdin-bide herdoildu
eta behialako bihotza terminus erraldoi.
sarearen normalizazio helburu abots metalikoek
manatzen digute noiz, nola,
eta non behar den eraitxi, bizi, iraun,
baina oraino ez dakigu chouchenn zergatik.
bi kantu, lau dantza eta zazpi jautziren
eskaintzeko astia emaiten digu
zeruan inguruminguru gosetian
dabilan denbora mugatuaren
hegazti beltz izengabeak.
hizkuntzaren prekaritate berdina
jasaiten dut bideari lotzen natzaiola
gauak baizik ez nauelarik sosegatzen.
zeru zohardi arrosetaz amets dagit
zurekin hitzegin ondoan
arrotz moldatzen gaituzten ekintza eta larderiak
oro haritzez, pagoz eta lizarrez azpatu
exilio eta heriorako xendrak dira.
bakardadearen legedia indarrean dago.
IV
bakardadearen poetikarik ez dut ekiten
are gutiago naski politikarik;
hargatik EPO (Euskaleskola Publikoa Orain!)
eskatuz antolatzen diren manifestaldietarako
jendeak gero orroaz oihukatzen dituen
lemak eta sloganak asma ditzaket.
nik hori poelitika deitzen dut
eta ez naiz batere harro.
autentizitate izpirik ez dut gaitzesten duten
militante xoil gisa ekiten dudalako
mintzatzen naizenero.
astia dut eskas, loa ere bai ardura
eta mundua hitsetik hotsera dabilkigu
birtuala baino gehiago den
zurunbiloan.
ohe bat eskaintzen baldin badidate
halaber hizkuntzaren lege bat
bakardade linguistiko honen partez
zin dagizuet ene ibilmoldea normalizatzen
saiatuko eta larunbat eguerdietan joanen naizela
laneko kolegen antzera mac donaldera
bazkaritera: xede ederra ez?
baina amets gaizto hortarik urrun nabil
gauak baizik ez nauelarik sosegatzen
eta literaturaren merkatuaz
axolarik ez dut.
V
axolarik, are gutiago tematzeko aitzakiarik
ez duten pentsuak irintzearen bortxaz
ahosabai kolpatuetan mihiak minberatzen dira,
toteltzen, moteltzen, ainitzetan odola dariela.
perpaus egokiak, mintzamen galduaren zauriak,
doluak, damu eta etzidamuak antolatzen ditu
autentizitateak sortu mututasunaren harpeetan.
hitz lehorren marmarikatzeko noizbait
ezpainak zabaltzen direnean, beldurraren mihiak
kurutzatzen dira, lekeda epelak nahasten,
milika-lapa etsituaren ausikiak
desiraren oinarriak bailiran!
mendeen bekaizgoaren mendekutik datorren
burlazko irri baten zapartak ondikotz
geldiarazten ditu mihi apaletsien
samurtasun-saioak, hurbilketa daldaratsuak,
frustrazioak eta ahalge xirrixtak areagotuz.
bakardadeak larrua jotzen du, sarraskitzen,
eta xoilik merkatuaren legeen arabera
sexo herabeak hasten dira elkarri mokoka
nor gehiagoka gerla honen tresna bihurtzen da
KAOSaren samina inarrosiz
intzirikari doan mihia.
gauak baizik ez nau sosegatzen.
apirilako euri-egunak herrokatzen dira
amodio bat behin sortu zela ttanttaka oroitaraziz,
eta amodio harek ezki-hostoaren iraupena zuen
bedatsean muskil, larrazkenean kamuts eta neguan hil.
alta ezki usainak, bihotz kolpatuetan nahikundea
hedatu zuen eta ondorioz are mingarriagoa
suertatu zen hosto haren eihartze iragarria!
egia izaitetik, alegia izaitera lerratu zen
iduriz azken aukerako amodio herbail hura.
aurten, plazako ezki-lerroak berriz
hostailtzen direnean, memoria ausentzia latzaren
larre gaitzetan dabil, noraezean, zoraturik bezala,
azken aukeraren mugaren haraindian;
bide dolorosa zilatzen da zeru grisaren
hedadura urra dezakeen leihoaren maldan,
irria, kantua, urratsaren oihartzuna,
sabel epelen erronkak urruntzen diren
bitartean.
ezkiagan barna ibiltzean, sudur-maxelak ikaran,
ihesi doan ihiziaren antzera,
antsia hurbiltzen da
amodioa, urtaro zarpaila date, eta goiz nabarretako
meteo agiriek ez dute hobekuntzarik
hitzemaiten,
ezki-usaineko galerna baizik.