Itzulerarik gabeko bidea
Itxaro Borda
I
arrotz herrestatzat baldin bagaituzue ere,
hilak ehorzten ditugun lurrekoak gara,
eta orduan
larruaren koloreak,
mintzoaren soinuak,
sendiaren ohoreak,
edo fedearen bermeak
axolarik ez du
hilak ehorzten ditugun
lurraldekoak gara,
nahi ala ez,
hori da gure ardura bakarra.
ardura bakarra.
II
diote
goraki dagoeneko
Historia bukatu dela,
mundu osoa sare bakarrean
gatibatua dagoela,
alanbrez inguratu
utopiaren larraitzak
debekatuak zaizkigula,
arriskuak kalkulatu gabe
ez dela gehiago untzirik
itsasoratzen ahal
mentura bila,
diote
goraki dagoeneko
setiatuak daudela
zure gorputzeko ezkin
desiragarri eta ilunenak,
balizko musugune bakoitzean
polizia bat
ezarri dutea?
eta karrikak justizia eskez
beltzatzen direnean
mundu osoko sarearen
pantailetan
irrinoa ezpainetan
agertzen dira;
pobreak!
diote
egituren heineratzearen
jende ondarkinak!
diote
goraki dagoeneko
Historia bukatu dela
egunak gaua irentsi duela,
balizko musugune bakoitzean
polizia bat
ezarri dute.
III
ordea ez dakite desertu-lehiak
aterbegabeen arteko
elkartasuna
errautsak hari ikustezin,
josten duela,
eskuhutsik ibiltzen
ohituak direnen
hiztegietarik
ETSAI izena
ezabatua izan dela
emeki emeki,
musu ebatsia,
paupasa herbaila,
ahurren balaka,
solasaren ixuri xumea,
oreka orkorraren
kalterako dela.
IV
hango bortu-gainetarik
altxatzen hego hatsak
beldurraren zainetarik
airatzen dira urrtasak
ez dakit erranen dudan
nolatan maite zaitudan
behar-griņa bedi lerra
lo hiletik gau hotzera
zure so beltzen ederra
joan dakidan bihotzera
ez dakit erranen dudan
nolatan maite zaitudan
hauts eztiaren zaparta
hitz arruntaren balaka
suak bultzatu du barda
mintzo ausarten kalaka
ez dakit erranen dudan
nolatan maite zaitudan
lur hutsetik begiraino
amets hotsa dut ekarri
bihotz honen hegiraino
zazpi musuz bake jarri
ez dakit erranen dudan
nolatan maite zaitudan
V
poeta adiskide zenaren gisa,
gauaren atzekaldetik jalgitzen gara,
sohakoaz elkar sustengatuz
ilunaren altzo epeletik aurdikirik bezala,
begiziloak idor eta argizirrinta etsai
ondarkinen usain kirats gohaingarria salbu,
behialako gudukalorrek hutsik diraute,
urruneko ortzaizetan
atabal joaldi elkorrak
hautemaiten diren artean.
GURE LURRA GURE
ESKUETAN HARTUUU,
diogu zeru grisen gerizan
ozen diren kurloei eta gauak
harrapatzen gaitu
egun sortu berriaren laino trinko bekaitzetan
aterbetzea
merezi ere ez dugun izakiok!