Jagoitik basamortu horailak dira desiatzen...
Itxaro Borda
JAGOITIK basamortu horailak ditut desiratzen,
itsas ertz biluziak,
karrika hutsak,
eguzki hobengabeak kiskaili larruak,
irri partekatuak noiztenka
eta denbora.
elearen lainoa plazaren erditik
kezkaren soseguz agurka
hegaldatzen denean,
azkorriko zeru ubelegiek biltzen naute
eta denborak.
lerratzen dira so auherrak
ditut maite eta denboraren
bihozkada hunkituak
ezer ez has, ez pentsa, ez erabaki,
ez mintza amodioaren aitortzeko ez bada,
utz bizitzaren hautsak herioaren itsutzera
eta ibili
denboran bezala
kanta baten hatzetarik oinik dukedano.