Wor(l)d apart
Itxaro Borda
Uhinen kantak lagun, gabiltza,
itsas ertzetan hurbil-hurbilak
edo bilduz gau-minaren giltza,
eskaintzen bakar, dantza gurbilak
mozkorrak gazi, azkar beldurrak,
ixilik gaude, mutu lizunki,
desirak hozten ditu elurrak,
eta sutan agertzean lurrak
ezin gara nehoiz elkar hunki!
Alta badira buru-zokoan
ontsa apailatu mila perpaus
zihikalari nahas gogoan,
ahoan hausten direnak, errauts!
gorputz leunak dira bilatzen
itsumandoka hor oinazean,
ezpainen ezti hura zilatzen
keinuz bata-bestea kitatzen
goza ez daitekeen haizean...
Luzatzean, han ohe hutsean
logabean altxatzen mamuak,
ilunaren mihi lanputsean
kixkailtzen gaituzten damuak!