Nork kontatuko du herriko haurren...
Itxaro Borda
Nork kontatuko du herriko haurren
zorigaitza piztiz inguraturik amak
urrunera joaten ikusten dituztenean
herriko haurren auhenak
herriko haurren zorigaitza plazetan
dabiltzanean lakrimogenoz intzirika
negarrez arratsalde baketsuetan oi
herriko haurren auhenak
jadanik galtzen dutelako iduripenaz
hantuak ezpainak beldurrez azpilduak
gauez ohantzeetan garrasiaka ama!
herriko haurren auhenak
bidegabeko barbaritatearen errainua
su eta odoletan hedatzen doalakotz
adio erraten goizegi ikasi dutelako
herriko haurren auhenak
zeruak gorriz koloreztatzen dituzke
herriko haurren auhenak
arrosen hats bizi bilakatzeraino