La porta oberta en el cel, i aixo

Itxaro Borda

 I

 herri hau aipatzen diguten aldi oroz,

 elizetako

 barne mukurru beteak erakusten dizkigute,

 emazteek beherean

 "zuk kentzen duzu munduko bekatua"

 eta

 gizonek galerietan

 "urrikal jauna"

 kantatzen dutela.

 "emaguzu bakea" deiadarkatze

 bakoitzean, irri bat desagertzen da

 hemengo bizidunen ezpainetan.

 II

 requiem dio haizeak.

 udako lantzurda maltzurrik

 egiten ez duen

 lurrak ez zaizkit gustatzen.

 nere azken egoitza ankerra

 josiko doten

 xurxuriak laztantzen ditut.

 requiem dio haizeak.

 III

 etxez etxe noa

 ganaren bakar minean

 entzungo nauen norbaiten bila.

 IV

 mugaz bestaldean dago

 biziteko estakuru ahularen marka,

 mugaz bestaldean dago

 etseitzeko arrazoin azkarraren bidea,

 mugaz bestaldean dago

 ebatsi nizun musuaren orroitzapena.

 mugaz bestaldean dago

 dena,

 eta deusik eztago...

 V

 estatistika ofizialen arabera

 euskal herri barnean

 jende baino ardi gehiago dago

 horregatik

 gasna

 urre xuria da.

 eta nik gasna ez dut maite.

 estatistika klandestinoen arabera

 euskal herrian

 ardi baino polizi gehiago dago

 horrengatik

 bakea

 segurtatua da.

 eta nik bakea ez dut maite.

 VI

 besteen aho zoriontsuetan

 nihauren bakartasunaren

 eremu desolatua

 izar dezaket.

 no woman's land erraldoia.

 askatasun biluziegiaren

 madarikazio mutua

 jasan behar dut

 oraindik.

 VII

 ogre handiaren

 aurka

 daramazkigun

 borrokak oro

 debaldezkoak ote dira

 montsegur?

 consolamenturik gabe,

 hilgo

 edo

 joango gara.

 haize hotza

 harrien

 arteka eskainietan

 emeki

 lokartzen da, kabitzen zaizu,

 montsegur.

 noiz eta nola sinets

 irabaz dezakegula?

 VIII

 arkaitzak moztuz

 barrikadak altxatzeko

 gogoa ematen didan

 mare nostrum.

 zeren bila hoa

 balantzaka

 ezpain herbailduak

 lizunki

 gaziten ditunalarik?

 uhin haserretu honek

 amodio eskas gaitzak

 betiko

 urkatuko ditin

 mare nostrum.

 gure itsasoa baino maiteago haut.

 IX

 eguzkiak

 ez dezake

 ekaitzen ondorioz

 ireki

 leize lohitsua

 lehor.

 sega

 ditzala

 orduan

 mendiak bezala

 nere beso

 kurutzatuak.

 el nostre pa de cada dia...

 X

 AVUI

 declaracio oficial del govern central:

 la guerra civil espanyola ja és

 definitivament

 historia

 amnesia

 gora

 bartzalona olinpikoa!

 XI

 opari bat eman nahi nizun,

 eta karrika nagusian

 eske zebilen

 beltzez jantzi andreari

 julufri gorria erosi nion.

 loreak,

 zure senargaiak eskainirik baizik

 onhartzen ez zenituela

 konpreni eraziz,

 ez zenidan julufraia hartu...

 orduan,

 lili umila ezpaineratu nuen

 apalik

 grandola vila morena

 terra da fraternitade

 kantatuz.

 XII

 gauero

 hiri berdinaz

 amets dagit,

 gauero

 zure itzalari

 loturik

 haserre traketsak

 laztantzen ditut.

 gauero

 metroko arroiletan

 kantu zaharren eran

 maite zaitudala

 errepikatzen ditut.

 eta

 zuk

 gauero

 kaioletan salgai dauden

 txori exotikoen

 ikustera naramazu

 erranez

 begira

 zer

 ez dugun

 bllakatu behar.

 XIII

 nola asmatuko dut

 argazki xuribeltzean

 zure begien kolorea?

 nola entzunen dut

 argazki xoilaren bidez

 zure irriaren karkara?

 STOP handia.

 XIV

 noraino joan ditezke portuko untzi hauek

 itsas gainean behin abiatuz gero?

 kaiertzean jarririk

 gaudenean

 arrotzegi senditzen

 zaitut,

 ametsetako ugarte tropikalak

 baino urrunago

 oooooo...

 kristobal kolonen harria

 portuari begira dago,

 amerikak?

 urrez kargatu txalupak menturaz

 greziara doaz.

 maremar...

 sant pau karrikako nesken

 usaina haizeak

 hirian zehar barreiatzen du,

 eta generalitat plazan jendeek

 sardanak dantzatzen

 dituzte larunbatero.

 mosso del esquadra.

 gaudiren izpiritu damutua.

 montjuich

 sutan

 ikusi nuen

 antoni ribasen filmetan.

 noraino joan ditezke portuko untzi hauek

 ni hemen zure zain nagoen bitartean?