Exilium tremens...
Itxaro Borda
suak erretzen gaitu
bizitzekotan
infernua nahi dugu.
Aitor eta Mari
gure arbasoak dira,
hala ere
umezurtz senditzen gara
noren faltaz?
denak ados dira
euskaldun jatorrak eta erdaldunak
herri honek ez duela
zaharren hildo zuhurretik
nehoiz atera behar.
bortizkeria guzien kontra
izateko ordez
mila aldiz hobe da
bat hautatu ondoan
haren aurka jotzea.
gero eta urrunago
joateko gogorik ez baldin badugu
ez ditugu sekulan
kartzelatzen gaituzten hormak
hautsiko.
ez direa konturatzen
fandangoa
norma zehatzen arabera
dantzatzen dutenean
emeki hiltzen ari direla?
bertsoak entzun.
liburu errexak irakur.
atzerriak madarika.
euskara salba...
presondegi bakarra
euskaltasunak
dakarren
kontzientzi ona.
ilargia ebatsiko dugu?
aber...
elizak zartaraziko ditugu?
aber...
hemen dabiltza
aber... tzaleak
eta mirakulurik ez da izango.
traidoreak bezala
eramango gaituzte
nehoiz bekaturik egin ez duenak
igor biezagula lehen harria,
besteek segituko dute.
kultura bakoitzak bere morala du...
suak erretzen gaitu
bizitzekotan
infernua nahi dugu...