Orioko elizan

Itxaro Borda

 Orioko elizan belauniko.

 Aspaldiko partez otoitzez.

 Zu Jainkoa

 bakartasun handienaren jabea

 izan zaitez

 nere bakartasun jasan ezinezkoaren labea.

 Zuk Jainkoa

 nonbait baldin bazaudez

 entzun itzazu

 Orioko eliza ilunean

 deiadarkatzen dizkizudan

 haserrezko

 hitz hautsi

 hauek.

 Zu Jainkoa

 ardura madarikatu dut

 zure izena,

 baina gaur

 Orioko elizan

 zure urruntasun hormatuaren

 beharra

 hezur muinetan

 nabaditzen dut.

 Eh Jainkoa!

 ez dizut barkamendurik

 eskatuko,

 ez naiz damu gorritan

 sartuko,

 dakidalako ni bezalako herballei

 ez dela

 den mendrenik

 barkatzen.

 Orioko elizan

 nere bizi modua

 konsideratzen dut

 "maiteak zergatik hutsik utzi

 ninduen ez dut oraindik ulertzen"

 eta lepoko zainak

 gogortzen zaizkit

 negar hits gutizia

 erraietan ito dakidan.