Hire gorrotoaz

Itxaro Borda

 hi euskalzale zintzoa

 bidezko euskaldun bakarra

 gogorra haiz

 euskaraz mintzo

 diren jende arruntekin,

 baina lainoa eta milikaria

 erderaz hiri zerbait

 diru

 ohore

 kultur zentroetan

 leku

 eskaintzen dizkaten

 gobernuko mezulariekin.

 Egun batean boterearen

 kaka usain zirringatsuan itoa

 iratzartuko haizelarik

 ikusiko dukek hire

 herra

 gorrotoa

 mesprexua

 ez dukala tokirik egokienean

 erabili,

 eta orduan

 gure aldetik

 ez duk barkamendurik

 ardietsiko.

 Anartean josta hadi

 zikin hadi

 desbalia gaitzak,

 hi euskalzale zintzoa

 bidezko euskaldun bakarra...