Kaskezur

Itxaro Borda

 bai, zuek ez dakizue, baina nik badakit

 heriotz ondoan gizakiari zen gertatzen den.

 zerura doakela, hori bi mila urte hauetan

 sinets arazi diguten gezurra da.

 bai, zuek jakin nahi zenukete eta nik

 badakit, badakit zer gertatzen den.

 beriotz ondoan gorputzeko ur bitxiak pizten dira,

 zelula hilak ezeztatzen hasteko,

 ur keldartsu horrek, hiroduraren bidea irekiz,

 bakteria emankorren goseak susta ditzazke.

 eta dantzaren zorabian sartzen dira

 haragia usteltzen, urrintzen, zirringatsutzen

 ihaurrika nahasian parteka erortzen ari denean,

 sartzen dira,

 arbiskak eta herrestariak,

 har sortu berri malatsak, zizare familia osoak,

 mamutxa asekaitzak, eta

 airean, kinka kaltekor hontaz baliatuz,

 zirurikan, haserrez ziztaka, idurikan antziz eta zaunkaz,

 ulu beltzurdinak, muruak, lespadak eta arrano gosetiak.

 denbora gutiz gorputza ezer ez da

 eskeletako hezur gisukiz bustuak

 lur barnean edo gainean

 abanztearen eguzki erreak zurituko ditu.

 datorren larrazken hegotsuan

 bare karakoilak, arkamelu eltxarrak,

 suge hotz nagiak eta kuskandel hormatuak

 neguaren iragaiteko kaskezurraren ziloetan,

 ginarrez eta zamez beteak ziren zilo guzietan,

 kabituko, kokatuko, kokartuko dira.