Zazpi aizparen gai dan oiala

 Zazpi aizparen gai dan oiala

 ebakirikan erditik,

 alde batera iru soiñeko,

 utzirikan lau bestetik.

 Guraiziakin bereizi arren,

 bakoitza bere aldetik,

 ezagutzen da jantzi dirala

 zazpiak oial batetik.

 Oialtzat artu zagun Euskera,

 guraizitzat Bidasoa,

 -ibai koxkor bat besterik ez da;

 utsa... balitz itsasoa-.

 Elkarren urbil daude zazpiak;

 muga deitzen da Pausoa...

 Zergatik izan ez bear degu

 famili bakar osoa?

 Arbola baten zaiñetatikan

 sortzen diran landareak

 bezela gera, Bidasoaren

 bi aldetako jendeak.

 Berdiñak dira gure jatorri,

 oitura eta legeak.

 Ama Euskerak magal berean

 azitako senideak.

 Oialarena ongi iduri zait

 -dio Beltxak saietsetik-;

 baiña sei zati diran tokian

 zazpiren kontua nondi?

 Bizkaia, Araba, Gipuzkoa ta

 Zuberoa ta Lapurdi,

 Naparroa bat ezagutzen dut

 gezur-mugaz an-emendi.

 Zazpi baiño leen, esana aldatuz,

 esagun, ba dirala aski:

 Naparroa bat -eize gaisoa

 bi zakur goseren jaki-.

 Oso ta bakar Euskalerria

 dela edozeiñek daki;

 mugaz angoa Espaiñi ez da,

 emengoa au ere ez Prantzi.

 Zazpi Eskual Herriek

 bat egin dezagun,

 guziak bethi-bethi

 gauden gu Eskualdun.