Ixilik eziñ egon naiz eta

Olea, I.

 -1-

 Ixilik eziñ egon naiz eta

 astera nua bertsotan

 orretarako gaur maixu jaunak

 artu nai ditut aotan.

 Oien gorantzak irakurri ta

 entzunagatik prankotan

 ez ditugula aintzat artutzen

 iruditzen zait askotan.

 -2-

 Bat edo bestek esan lezake

 beste berritxu bat ara

 itz biribillak jaulkiko ditu

 gure belarrietara.

 Baña maixuok ez uste izan

 nijoanikan ortara,

 itz utsez ezta iñor jasotzen

 merezi duan mallara.

 -3-

 Zenbat losintxa ta zurikeri!

 Nola litezke eraman?

 Maixu jaunak nork geigo igurtzi

 or dabiltz guztiak deman.

 Itzezko sari ezerez ori

 aizeak nola daraman

 askozaz ere obe litzake

 erdia dirutan eman.

 -4-

 Aspalditxoan gauz batzuetan

 egiñ arren alegiña

 erakusketa aztu xamarrik,

 ori da gauza jakiña.

 Gaur jakinduriz beste batzuen

 malla iritxi eziña,

 ez estuenaz aurrera lanak

 artuaz asi bagiña.

 -5-

 Erakusketa bear bezela

 moldaturik bagenduke

 agian beste zakur batek gaur

 zaunka egingo liguke.

 Orregatikan maixuak ordaiñ

 tajuzko bat bear luke

 gaur egunean iñork nai al du

 lanik egiñ musu truke?

 -6-

 Egarri degun aurrerapena

 ikastetikan badator

 lendabiziko maixuei lagun

 egiñ oparo ta jator.

 Egia da ta au esatera

 kezkarikan gabe nator

 ortan botatzen degun dirua

 berriz geuregana dator.

 -7-

 Entzuten danez beintzat maixuak

 meritu asko dituzte

 ezer izango ez giñan pranko

 gizon egin baigaituzte;

 makiñatxo bat bizi-bidean

 sartu ere bai, nik uste.

 Zergatikan ez ordaindu bada

 balio duten ainbeste?

 -8-

 Gure umeak eskolaratu

 ta lasaitzen geranean

 zorrotz eskatzen degu maixuak

 piñ saiatzeko lanean.

 Poz pixkatxo bat ona da zintzo

 jokatu bear danean,

 baña bestezaz gogoratzen ez

 geu ondo gabiltzanean.

 -9-

 Maixuen esku egonik gizon

 askoren etorkizuna

 lagundu bada ondo betetzen

 daukaten bearkizuna.

 Kendu lenengo bizi eziñak

 duan eramankizuna,

 geure onaren billa bagabiltz

 or danon eginkizuna.

 -10-

 Maixu jaunaren lanak bear du

 tokatzen zaion ordaña

 ezin-bizi ta bearkeriak

 artu ez dezaten gaña,

 atzerapena dute gaitz oiek

 beren sustrai eta zaña.

 Ta, zerk pizten du aurrerapena

 jakintza on batek aña?

 -11-

 Jakintza on bat ez al du gaurko

 gizadiak oñarria?

 Ezjakiñaren bizi-bideak

 beti motza du neurria.

 Obeto izan naiak berekiñ

 nola duan egarria

 danon artean arretaz zaindu

 bear degu iturria.

 -12-

 Danok nai degu etorkizuna

 ikusi garbi ta lasai

 al baldin bada geu ondo bizi

 ondorengoak ere bai.

 Ori guzia ezin liteke

 iritxi noski nolanai

 ez badakigu egin bideak

 erakusteko daudenai.