Legortea
Jauregi, Luis
Ba-datoz baserritarrak,
gizon sendo ta andre zarrak
goiz-goizean elizara...
bete da eliz txikia...
ezkillaren ots bizia
zabaldu da emen ta ara.
Aldare-nausi-aurrean
asi da otoitz luzean
apaiz jauna belauniko.
Erria otoizka dago:
"Ez gera, Jauna, geiago
Zure kaltez ibilliko".
Asi da prozesioa...
Gurutzea aurretik doa
ta San Ixidro ondoretik:
banaka mutil ta aitonak,
erdian eliz-gizonak,
andreak berriz, atzetik.
Buruak makur gizonak,
erdi-negarrez amonak,
otoizka apaiza kantari:
"Entzun gaur gure eskaria;
aren, bear dan euria
biali gure erriari"...
Ba-doaz baserritarrak,
gizon sendo ta andre zarrak
baserrieta lanera:
pozik eta alai dijuaz
itxaropenaren suaz,
ume zintzoen antzera...
Jauna,urrutitik etorri dira
batean otoitz-eitera,
ta aien otoitza entzute-arren,
erdian Zu egon zera.
Ikusi zaitut antxen erdian
Artzai onaren antzera.
Itxaropena Zugan jarrita
itzuli dira etxera.
Aldendu, bada, gure zigorra,
txikien Jaun biozbera,
ta atoz lenbailen gure soroen
egarri au asetsera.
|