|
Etxeko kea
Lizardi, Xabier
Aidean, eder usoa,
mendi-mendian, pagoa...
Etxe gaingorriak emana
kea dun ederragoa.
Basalurrez bidalari
ke urdiņa ba-dut nabari,
ai nire poza, uraxe baita
gizalur-ezagungarri.
Aurki, aldean, oloa:
maldan etziņik, soroa:
etxe zabal telagorria,
aurrean intxaurrondoa...
An dun bero, ta an dun bizi...
An, aur-yolasen karraxi...,
Gauez, sutondora bilduta,
eguneko lanen sari...
Nireganago, maiteņo:
aurki, bata bestereņo:
amets!, iņularreko izarra
zeruan piztu dediņo...
Eztai-egunez, maiean
Indi-oloak salean...
Ortzia bezain urdin, kea
telatutik, biarrean...
Leiotik, ogei baserri,
mendiaren apaingarri;
zenbait zabal ditun ageri;
zenbait, erdika nabari.
Batak besteak adiņa
kea guziek urdiņa...
Susmo niņan zeru goxoa
keok ote zen egiņa!
Maiteņoa zait il atzo,
aretoan gorputz dago
Leio zabaletik, mendia;
aizeak, eguzki giro...
Aidean, eder usoa,
mendi-mendian, pagoa...
Etxegaņetan ederrago
biziaren kea-mordoa,
Azti zitala belea,
erio-ondakin zalea...
Zerraldoa dagon etxetik,
ura bezain beltza... kea!
|
