Xabier Lete-ri bertsotan
Borda, Itxaro
"Euskal herri nerea behar zaitut maite"
Solas ederregorik munduan ez daite
Herri batentzat egun arnasa emaite
Ederra da bai eta euskaldun izaite
Xabier hartu sailan luzaz joan zaite.
Xabier Donapaleun zaitut nik aditu
Nere ahal ezina lastar da haunditu...
"Ni naiz" horrek erroak nondik ote ditu?
Bihotza ilun baitzait pilpiraz eritu
Zure erranak ditut barnetik senditu...
Nere haur amentsa da egia bihurtu
Denboraren elurra eguzkitan urtu
Lehenego banintzan beldurraz uzkurtu
Eta kopeta gaina bazaitan zimurtu
Askaturik, kateak hor ditut apurtu
Euskal herri guztiko poeta sakona
Hitzaren aurre horten isilik dagona
Askatasun gostua bait da oso ona
Kantatzen duzu beti "Hemen naiz gizona..."
Ba dirudi zu ziren guretzat aitona...
Nik uste maite dugun gizon bere jator
Urepelen sortu den artzaina Xalbador
Hura bezala Nafar alorretik nator
Xalbador ibili da beti aintzinakar
Zeukan itzal goxoa bekigula etor!
Zur'ahoan hitzak du gezurra irestan
Eta guk bat batean egia miresten
Orduan bi begiak badituzu hesten
Poesiaren hatsa duzu erdiesten
Zu bezela Xabier diot "dut sinesten"!
Bertso hauk eman ditut papera gainean
Donapaleun kantari izan zarenean
Zuhauri mintzatzeko bildur nintzanean
Hitzaren indarra dut aditu zainean...
Zuri beha egon naiz sala ilunean...