Sartaldean krisisa

Borda, Itxaro

 Sartaldean krisisa da ekonomika

 Aserikan jendea salmena gaindika

 Erho den gizartea dadin itzulika

 Botatu lur gainerat bonba atomika!

 Ondorio goxoak ekarriz orori

 Egiten ahal dugu garbiki lan hori

 Neutron bonba etzaio itsusi nehori

 Etxeak zutik utzi hil gizon ta xori!

 Auzoan daukagula zentralaren malda

 Afarian jaten da uranio salda

 Ez neri ona denez oraindanik galda

 Gaitziturik laster bait nindaike asalda...

 Aberatsak harturik beren eskubide

 Ondarkinak guziak itsasoan gorde

 Irradiaturikan "atun adiskide"

 Sareetan biltzen da arrainaren orde!

 Gorputzak bizitzeko behar du odola

 Eta gure mendeak hortako petrola

 Itsasaldia beltza hedatzen dagola

 Diruaren meneko non dute axola?

 Petrola sortaldeko herriei ebatsi

 Emendatzea dugu bertan erdietsi

 Guretako arnoa haiendako patsi

 Nardaturik dituzte iturriak hetsi!

 Ez da ez iraganen horrela kondaira!

 Indartsuak datortzi harmekin mahaira

 Berextasunak legun ehortzi mintzaira

 Katanga haren kontra lagundu Zaira!

 Kolonien denbora oi goxoa zela!

 Ezin dute ordea pentsatu bestela

 Berdin Euskal herria bihurtuz ustela

 Bere bizi kemenaz hustu dezatela!

 Separatistak dira baztertu beharrak

 Oihu luzean dio Frantzia zaharrak

 Nahikerian salbai Debre jaun azkarrak

 Erhauts egingo ditu Herrien bizkarrak!

 Prezioak goitituz xumeak balaka

 Lehen ministroak du ederra kalaka

 Aberastu haundiak dirade milaka

 Besteak pobreturik doaz taka-taka...

 Estato arrazoina lehen den ezkero

 Hil dadila kartsuki bakar Aldo Moro

 Kontzientzia onarekin isil gaiten oro

 "Brigadista horiek dira gazte xoro!".

 Maxinak buruzagi karkula ondoko

 Herioa sartu da lurraren gogoko

 Maitasunak nahi du bizietan xoko

 Bainan ez dugu hartzen hartarik geroko !