Poloniako kasuaz
Borda, Itxaro
1
Varsoviako karrika beltzak negu latzez elurretan,
Magasinetan lerroz-lerroka jende oro beldurretan...
Jaruselski jeneralaren tankak burdin segurretan
Indartsuaren botere hura daukatela hezurretan...
2
«Solidarnosc» hau moldatu zuten, urteak iraun baleza!
Askok zioten: «Poloni hortan primadera egin beza!»
Abots batean ihardetsirik Rusia berari eza
Guzien buru ezarri zuten langile bat Lech Walesa...
3
Gose saminak handiturikan Polonian haurren lotsak,
Abendoaren hamahiruan zilatu ziren bihotzak:
Udaren ordez ukan zituzten zapalkuntzaren ahotsak
Eta tankeen gainean zauden soldadoen begi hotzak!
4
«Emendaizen den auzi debrua Poloniako partean,
Poloniarrek beharko dute trenkatu beren artean...»
Europar hauek hori diote jabaldurik anartean,
Brejnev Varsovin ez da sartuko Reagan azkar den tartean.
5
Gaurko mendean gizon osteak nolaz diren gosez hiltzen
Eta gogoko bakea gatik beste guziak ixiltzen...
Bitxikeriak sortu loreak oraindik ditugu biltzen,
Kontzientzi on beroarekin haiek golkoan ibiltzen!
6
Ez naiz ariko debalde hutsez nere gozoan negarrez
Mendebaleko herri horretan eegortzen diren belarrez,
Ez eta ere Poloniarrer, xendra bidexka zeharrez
rabazteko borroka diten prediku egin beharrez...
7
Iduritzen zait Europe zintzo, batua dela alaino
Entzuten baita gehiago ai! Poloni barman baino,
Fidatzen banintz erran nezake beldurrik gabe oraino:
«Faltsukeria ez da agertu hola nehoiz egundaino!»
8
Azken bertsoa etsiturikan erortzen zait espainean,
Borondatea ukan aren deus ez dezakegu zainean,
Itxura batez orroit gaitezen indarraren ordainean:
Chopin-en esku zauritu hura piano baten gainean...
