Pilota partida oragarren

Borda, Itxaro

 1

 Maiatzaren jendeak alegera dira

 Bidean badoatzi eguzkia gida

 Pestetako batzuek moldatzen korrida

 Gure herrian aldiz, pilota partida

 Oragarren horrekin ontsa kontent gira!

 2

 Plazetan ibiltzeko denbora ederrak

 Oro lagundu ditu, Jaunari eskerrak

 Fordinek Cousteaurekin ereman lasterrak

 Duhois eta Casetek garbitu bazterrak

 Aintzin-gibelak nola eskuin ta ezkerrak.

 3

 Errekarteko Frantxua punduen kundatzen

 Ari zeraukun eta jokoa kantatzen

 Musikak giro one betikotz landatzen

 Shooting Stars entzunikan kobreak hondatzen

 Segur herriko plazan anbiantza bazen!

 4

 Punduak eskuaraz zauzkigun emaiten

 Frantsesez, biarnesez zituen erraiten

 Hala zerbait ikasiz, akomatu gaiten

 Jean-Frantxuaren berdinik ez da atxemaiten

 Ez dut uste munduan besterik balaiten...

 5

 Caset pilotaria herri hontakoa

 Pagolan sortu eta da Teilorokoa

 Denetan irabazle, fama handikoa

 Ameriketan ere bota du pikoa

 Ordea hiru punduz galdua gaurkoa.

 6

 Ez ziren horregatik jendeak kexatu

 Pilotari guziak zituzten ospatu

 Zahar eta gazteak gero barreatu

 Ostatuetan barna partida aipatu

 Arratsalde goxoa ginuen pasatu.

 7

 Oraintxe emanen dut bertsotan azkena

 Ai zu! nahiko nuke hau balitz lehena

 Gore komitekoak, haientzat omena

 Guretzat aldiz bego gauzarik onena

 Gogo zokoan dagon orroitzapen dena...