Pariseko xoriak errana...
Borda, Itxaro
1
Atzo bisitaz naiz ni Bidarten izana
Pariseko Xoria deituarengana
Ixtorio pollit hat harek daut errana
Eta ustegabean sujeta emana;
Bertsotan ezartzeko ukanen dut lana...
2
Miserian entzunik kanpoaren deia
Bazen euskalduntsa bat Parisen sehia;
Negar malkoz itoa tristerik begia
Bidaia pagatzeko saldurik behia
Bizitzeko behar zen asko ideia!
3
Etxe buries batean lanean zen hasi
Bertako den frantsesa bortxarat ikasi
Ardura zuzen kontra gaizki ta erasi
Bere orroitzapenak zituen nahasi;
Bihotz kolpatu hartan bazauken garrasi...
4
Nagusia bazoan artetan kalera
Bazkari egiteko arrain erostera
Hirurekin zetorren gizona etxera
Emaztearekin bat ase egitera
Sehiari emanez txarrena jatera...
5
Baina gure sehiak hori ez onhartu
Komedi erhoari goiz batez ohartu
Ausartzean ere zen emeki azkartu:
Zituen bi txarrenak hotzgailuan sartu
Ta arrain handiena beretako hartu...
6
Igandea pasa-ta ohean etzanik
Nagusiak jin ziren jaterat azkenik
Biek ukan zituzten sehiak emanik
Bi arrain arras flako ta xehe lehenik
Handiena baitzagon neskatoak janik...
7
Ondotik etxe hartan zertsu zen gertatu
Ez da nehun ez nehoiz kanporat agertu...
Sehiak beti duke nausia artatu
Haren zerbitzuan bai ditake izertu
Diru pixka bat ore geroko baztertu!
8
Kondaira hontan zer zen ondoko morala
Irakurleak berak atera dezala...
Guk euskaldunek ere sehia bezala
Askapen xeheak utz, ez mira itzala;
Askatasun osoak estali gaitzala!
9
Bai, segur, Bidartea ostatu pollita
Osaba ta izeba eskertzen dakita?
Zoazte haren gare, hauxe da komita
Pariseko Xoriak dautzue hasita
Omorekin beteko gogo ta azita!