Nolaz aise hil...

Borda, Itxaro

 Munduko jakintsunek zutena sumatu

 behar haundi bat zela abian somatu

 Ta bonba atomika gordean asmatu,

 Gauza biribil honek gintuen xarmatu...

 Oraindik hobe dugu egoitea ixil

 Badakitelakoan nolaz gu aise hil

 Asmatzaile argiak zeinbat diren abil

 "Nobel" bake saria ahal balute bil!

 Hiri emandatutan gaituzte ezarri

 Okertuz begiak ta lehertuz beharri

 Nukleartegi pollit dagola beilari

 Aiten semen dute ebatsi lurrari...

 Etsaitzat harturikan gizonen egintzak

 Eta bertan fundituz lurraren emaitzak

 Bonbak beiratzen ditu bakezko agintzak

 Jostarien eskutan daude gure giltzak!

 Uranio tratatuz plutonio sortzen

 Osagarriarentzat kaltea ekartzen,

 Plutonio apurrak gizartea hiltzen...

 Horrelako egiak nolaz guk onhartzen?

 Uranio hondarrek pozindatuz lurra

 Haritz aldaxka dago altxatzen makurra...

 Arriskurik ez dala hori da gezurra

 Pentsatzen dudalarik heldu zait beldurra...

 Arrotzek nahi dute "kosta nuklearra"

 Herri kolonizatu hau dute beharra

 Lemoiz alde hortan DAVID-ek indarra

 Galdu izan du eta ez daike bakarra...

 Gizon jauntzi xuriak nere inguruan

 Muna bateren orde maxina buruan

 Nahi dut libre egon herriko zeruan

 Etorkizun osoa nihauren eskuan...

 Gobernuko gizonak ari xist eta xist

 Jendea informatuz ez bait dina "faxist"!

 Bateratuz komunist edo kapitalist

 Diot denek direla legezki terrorist...

 Nik esaten dut EZ-a gaur atomikari

 Gure herri borrokan lotuak elgarri

 Indar horren kontra has gaitezen gudari

 Ekosistema nahas ez dezaten sarri...