Miteran errege!

Borda, Itxaro

 Uda honetan sortu zauriak

 hitz betez ditu errausten,

 Miteran fauna errege handi

 Parisetik zaigu hausten:

 Bazter guziak arros lehorrez

 dolutan dirade jauzten,

 Kasu oraindik dituen xede

 ederrak ez diren hausten!

 Gure orduko oihu-nekeak

 zituelakoz laudatu

 Badu lau urte lendakaritzat

 genuela guk hautatu,

 Ez gara nehoiz egun bezainbat

 gezurtiekin ausatu:

 Herrian bere hitz legunekin

 hira asko du kausatu...

 Miteran fauna gaurko urtea

 izan dukezu bakarra,

 Langabezia poliki haziz

 ordena tresna zaharra,

 Kaletan jarriz ehun milaka

 polizi urdin zakarra

 Kartzelak eta komizariak

 betez sor zedin aharra...

 Zure golkoko arros zimelak

 emeki dira usaindu,

 Europa hontan bakea eta

 indarra behar da zaindu,

 Frantziak ere auzoen gero

 demokrata bere gain du:

 Eztradituak hartu ondoren

 Espainia egin saindu!

 Hala ere zuk Euskal Herrian

 ukanen duzu ohore,

 Inxospek eta Destradek berak

 emanen dizute lore:

 Zozo erdiak garela dion

 bringilak badu podore,

 Ahalgearen banderak dauka

 frantsesak duen kolore!

 Miteran fauna negar egizu

 urak ito duen hartaz,

 Miteran fauna hitza emazu

 gure kulturaren kartaz,

 laborarien minak kentzeko

 dirua eskain zapartaz:

 Errantzun ona bilduko duzu

 bihar koleraren zartaz!

 Egun batean Miteran jauna

 ez dugu deus eskatuko,

 Ez gara zutaz edo bestetaV

 gehiegi keskatuko,

 Egun batean boterearen

 kargak zaigu feskatuko

 Eta orduan hutsaren otsa

 dukezu galdezkatuko...

 Anarte hortan balia zazu

 bidaia iduri bele,

 Bazter orotan solas handitan

 hedatuz lau mila ele;

 Ongi etorri Miteran jauna

 zoaz bidetan pelele,

 Histori hontan ez dira beti

 uste dugunak tetele!