Juanja, Mikel, Imanol eta besteri... Iruñako bertsoak
Borda, Itxaro
Hondarrean ahantziz hitzaren ezinak
Karrikara ditzagun solas atseginak?
Manatzen dituela festa erreginak
Hona bertso berriak Iruñan eginak.
Iruñan pasaturik, gauza arraroa,
Bertan jastatu dugu udako aroa:
Zuen landetan gari, guretan garoa
Nafarroa bizi da zelai oparoa!
Poeta baten hatsa harturik osoan
«Maitasun ta gorroto» erraien zokoan,
Egon ginen Jarautan gaitzeko gozoan
Zaldiko Maldikora joateko gogoan...
Karrikan bertso hartan ginelarik hasi
Juanja, Mikel eta nik ginuen ikasi
Gostura botatzeko mila hitz nahasi
Ez dela beharrikan ezer irabazi!
Imanolek besteri gaiak ematean,
Eta Mayak patxaran pozik edatean
Ardura geldituaz Bronzeren atean
Bostak ibili ginen karilla batean.
Aizu Imanol lagun Orbaizetakoa,
Itsasoen bitsa da gaur denetakoa
Gure bien ametsen huts benetakoa,
Txurro gostua duten ekaizetakoa!
Hemen bertsotan euri xortekin ari naiz
Ortzantzak ihardesten didalarikan naiz,
Iruñako berora itzultzeko garaiz
Amikuze bustia utziko dut araiz!
Azkenean igortzen dizuet agurra,
Nere hitzek dakarten maitasun apurra,
Zabalikan datxikat hor esku ahurra
Emankorra delakoz Nafartarren lurra...