Jainkoen suak
Borda, Itxaro
1
Izkribu zaharretan, diote ardura
Jaunak eman digula beraren itxura:
Nola iturri garden, lasai itsas ura
Guri ere faltatzen perfekzio hura!
2
Zer da zuzen Jainkoa - gero bat segurra
Garraitzen du guretzat herio beldurra...
Zer da zuzen Jainkoa - neguko elurra
Ala bizkarrak jotzen dituen egurra?
3
Jainkoa hiltzen bada gizonak bakarrik:
Hutsaren aintzinean ez dauka indarrik,
Bare begietan ez daduka pindarrik
Ez badu irabazten pario zakarrik...
4
Gaixo gaixo Jainkoak trukean du galdu
Gizon ingrate honek baitu atzo saldu:
Hortan beste Jainkoek besoak zabaldu
Beste paradisuek, gogoak zapaldu...
5
Oi entzule maiteak zergatik elkortu,
Hitzok nabaritzean negarrak legortu
Gizasemek Jainkoak baitituzte sortu
Beren zalantza gazi haien ihes portu...
6
Behar dugu askatu, behar dugu joan
Jainko guzier sua ebatsi ondoan
Munduaren bidetan geroa gogoan
Gure izatearen negurri osoan...
7
Moralisten arrano hura zirurikan
Ikusten dut zeruan gosez murmurikan;
Su ebaslen gainean dabil itzulikan
Haragi biziaz noiz ase idurikan...
8
Jainkorikan-ez bada guziak zilegi:
Heriotza normala, heriotza egi...
Gaizklaren ongia ongiaren begi,
Bakoitzaren bihotza, mundu baketegi...