Irratiz irrati...

Borda, Itxaro

 1

 Amets eroa zerait egunero hiltzen

 Negar xorta begitik hutsean amiltzen

 Irratiez irrati naizela ibiltzen

 Itxaropen zatiak ditut alfer biltzen!

 2

 Askatasunik ez dut gogoko nehola

 Ontsa ohitua nago azantzari hola

 Irratia pizteko zergatik eskola

 Botoin bat itzulika, utzirik axola!

 3

 Gaua hedatzearen bertako,lagunak

 Deitzen dizkigutela datozen egunak

 Kantuak ehun dira modaren hagunak

 - Ardura- entzunak ta beraz ezagunak...

 4

 Minaren zilatzeko irratiz irrati

 Igaro dut bakarrik gau beltzaren zati

 Fidantza emana dut jadanik punk bati

 Harek gizarte hauxet ez dezake pati!

 5

 Maitasunezko kantu zein diren idorrak

 Tristuran dagonaren haragi zigorrak

 «Maite zaitut» asko bainan iragankorrak

 Diruak manaturik betika gogorrak!

 6

 Bi kanturen artean dator erreklama

 Laudaturik gizona haurra edo ama

 Mila jende hunkituz aurkituta fama

 Salerospenak dauka irratian zama!

 7

 Irratiez irrati nahiaren bidez

 Boz ezezaguna dut adixkide ordez

 Irratiez irrati nabil eskubidez

 Nere maite maiteak maitasuna gordez!