Informa bideak euskaraz
Borda, Itxaro
1
Bertso berriak noa orain kantatzera
Mendean baitgoazi betitik atzera
Saiatzen ez bagara herria lantzera
Ez dugu heltzekorik euskal baratzera!
2
Ikasi dut frantsesa iduri ximista
Galdu gabe lanean argi nuen bista...
Gure zapaltzerako da kapitalista
Guri ari frantsesez hartuz telebista!
3
Irrati telebistak denen ondatzeko
Euskaldun subazterrak ixil egoiteko
Libertate itxura arras ez galtzeko
Badira hiru kate baten hautatzeko...
4
Bazkari denboretan egoera latza
«Informeak dira-ta utz azu erhatza!»
Kesako gizoneri luzatu behatza
Eta ahantzi saldan ezartea gatza!
5
Berdin du irratiak betetzen gogoa
Bakarrik dagonari eremaiten loa;
Aspaldikoa dugu frantsesen leloa
«Beha diferentzia, ezazolezkoa!»
6
Euskara utzia da, baitute baztertzen
Bost minuta egunaz sobera agertzen
Igandez ordu erdi, gaituzte lehertzen
Uste dute garela purruskez asetzen!
7
Alta denek ditugu pagatzen inposak
Beraz nonbaitik batzu dirade urosak!
Gure izerdiakin irabazi sosak
Ote ditu artatzen armadun baliosak...
8
Informa bideak guk hor ardiesteko
Eta hizkuntza berriz ondo ikasteko
Behar ditugu laster, denak nahasteko
Irrati telebistak Euskaraz hasteko...
9
Basamortu horretan ditzagun agurtu
Barnetx eta Dirrassar ez baitaude mutu...
Nahiz oraino ez den debeka apurtu
Euskaraz entzun eta berdin irakurtu!
10
Askatuko garela bai adiskideak
Bilduz elkarrekilan euskaldun kideak!
Jastatzen baditugu her'alapideak
Ai guretzat orduan informa bideak...