Ibanetako lepoan
Borda, Itxaro
1
Ibañetako lepo hertsian uraren kantu ixila
Aditzen dugu arratsaldean denborak ez baitu hila;
Oraindik noa xendrakidetik gure egiaren bila
Galdaka zer zen gertatu mila berrehun urte dabila...
2
- Euskaldun seme norat bahoa sorbaldan harturik arka
Ezpata zorrotz arin-arina mendi galduan bakarka?
- Ni gudaria naizenez geroz dutan solas hutsa barka
Ta nere partez etxean egon diren lagunak besarka...
3
Inperadore Karlos Haundiak loretsua du bizarra
Armada ere oroz gainetik segurra eta azkarra.
Desmasi asko eginik nahi zuken sustatu aharra
Bainan etzuen uskatu ahal gure Euskadi zaharra!
4
Zalduba eta Iruña biak prestu ezarririk sutan
Ixtoriak du binper trixtea egia erran batzutan;
Zioten denek euskal herrian, ari zirela bertsutan
«Inigo dugu, alde guziek fidantza egiten zutan!»
5
Oi Nafarroa, zu sortu zinen Ibañetako gudutik
Arrotz indarrak gordea zaukun esperantz bide galdutik...
Baina gaur egun deus ez da heldu gure askapen saldutik
Ordea nahi luke Herriak oraino ibili zutik!
6
Mendi kaskotik irritzin eta txalaparta zen aditzen
Ilunabarra jauzten delarik kantuak dira gelditzen
Agorrilaren hamabostean Errolan dute suntsitzen
Durandal-ak ez baititu euskal aintzindariak izitzen!
7
Mila berrehun urte luzetan guri gezurra erranaz
Faltsukeria bihurtu eta Ibañetaren omenaz
Beren egia gu zapaltzeko kondairetarat emanaz
Trufa kantua bazter dezagun arrotz alegia denaz...
8
Parisen eta Madrilen diren agintariek axola
Guti daukate gutaz, funtsean berek badakite nola;
Gure mintzaira Euskara ere azken hatsean dagola
Mendetan zehar nahiko zuten moztu euskaldun arbola...