Herriko zeinuak...
Borda, Itxaro
1
Hiru edo lau bertsu oraian nahi nintuzke kantatu
Herrlan zaizku zeinu axharrak supituki, bai, ixildu
Nolaz errazu gure zeinuek, beren boza duten galdu
Hortakotz kanpon hosto pollitak fite dirade ximeldu!
2
Berrehun urtez gure zeinuak bizi izan dira azkar
Eguerdi guziz anjelusean, laborari, xuti bizkar
Norbait hiltzean jendearekin zeinuek egin bai nigar
Aitortuko dut hetaz goraki: «Herrian ditugu behar!»
3
Prosper zenari bertsu hauekin agur bat hari zeruan
Zeinu jolea uros bizi da Jesusen amodiuan
Bizi guzian garbi egon da gure Jainkoa goguan
igandeetan ez da sekulan izan hura ostatuan...
4
Jakina dugu bizi zirela mendi hoietan laminak
Gizon ttipiak, mediku onak, sendotzen zituzten minak
Guk ahantzirik gelditu dira, utzi guri gauza hunak
Harpe beltzetan, argi trixtetan, zeruetarik ukanak!
5
Bainan goiz batez atzarri dira ta elizarat etorri
Ikusi tuzte zeinu berriak elektrikarekin ari
Erran dautate nigar batean «Hola trixte baita hori!
Ezin onhartu holako zeinu: ditzagun ixilarazi!»
6
Hortakotz egun mezarat berant gure gizonak jin dira
Ostatu hortan, luzeki dira egon baso bat bete-ta:
Arno onaren gustuak baitu, labur-arazten denbora...
Gure apeza, kexatu zen ta, errazu hau zer malurra!
7
Behar dugu bai usaia hartu zeinurik gabe sartzeko
Gure Jaunari, ordu bat beden, denek otoitz egiteko
Nik orai diot: «Xerkatzen dugu, zeinuen antolatzeko
Gizon xarmant bat, langile ona, eta sustut ez kario!...»
